அமெரிக்க அரசாங்கத்திற்கு ஒரு நீண்டகால பயம் இருக்கிறது. சீனாவிற்குள் நாம் கொண்டு செல்லும் செல்போன், லேப்டாப் என எதையுமே அவர்கள் ரகசியமாகக் கண்காணிக்க முடியும் என்பதுதான் அந்த பயம். அங்குள்ள வைஃபை முதல் சார்ஜ் போடும் கேபிள் வரை எல்லாமே ஆபத்தானது என்று அவர்கள் கருதுகிறார்கள்.சீனாவில் டிசிட்டல் கண்காணிப்பு மிக அதிகம் என்பது அமெரிக்காவின் கருத்து. அங்குச் சென்றால் நமது போனில் உள்ள ரகசியத் தகவல்கள், மின்னஞ்சல்கள் மற்றும் தனிப்பட்ட விபரங்கள் திருடப்பட வாய்ப்புள்ளதாக அவர்கள் பயப்படுகிறார்கள்.இதனால் தான் தற்போதைய சீன பயணத்தின் போது டிரம்ப்புடன் சென்ற நூற்றுக்கணக்கான அதிகாரிகள், பெரிய கார்ப்ரேட் நிறுவனங்களின் தலைவர்கள் என யாரும் தங்களது சொந்த செல்போனையோ அல்லது லேப்டாப்பையோ எடுத்துச் செல்லவில்லை. அவையனைத்தையும் அமெரிக்காவிலேயே வைத்துவிட்டனர். அதற்குப் பதிலாக, "பர்னர் போன்" (Burner Phones) எனப்படும் தற்காலிகப் பயன்பாட்டிற்கான போன்களை மட்டுமே கொண்டு சென்றனர். இந்தப் பயணத்திற்காக மட்டுமே வழங்கப்பட்ட மிகக் குறைவான வசதிகளே கொண்ட தற்காலிக போன்களைப் பயன்படுத்துகிறார்கள். இதில் முக்கியமான தகவல்கள் எதுவும் இருக்காது. சீன பயணம் முடிந்து அமெரிக்கா திரும்பியதும், அந்த போன்கள் முற்றிலுமாக அழிக்கப்பட்டுவிடும் என்கிறது பத்திரிகை செய்திகள்.சீனாவில் உள்ள பொது இடங்களிலோ அல்லது ஹோட்டல்களிலோ போனை சார்ஜ் செய்வதைக் கூட இவர்கள் தவிர்க்கிறார்கள். 

ஏனென்றால், சார்ஜ் செய்யும் ஒயர் வழியாகக் கூட உளவு மென்பொருட்களை போனுக்குள் அனுப்ப முடியும் எனச் சொல்லப்படுகிறது. அதனால் தங்களுக்கு எனச் சோதிக்கப்பட்ட பிரத்யேக சார்ஜர்களை மட்டுமே அவர்கள் கொண்டு செல்கிறார்கள்.ஆனால், சீனா இந்தக் குற்றச்சாட்டுகளை முற்றிலுமாக மறுக்கிறது. ஃபாக்ஸ் நியூஸிற்கு அளித்த பேட்டியில், சீன தூதரக செய்தித் தொடர்பாளர் லியு பெங்யு "நாங்கள் யாரையும் உளவு பார்ப்பதில்லை, மற்றவர்களின் தனிப்பட்ட தகவல்களைச் சட்டப்படி பாதுகாக்கிறோம்" என்று கூறியிருக்கிறார். எனினும், ஆப்பிள் நிறுவனத் தலைவர் டிம் குக் உள்ளிட்ட பல கோடீஸ்வரர்கள் இந்த விதிகளைக் கட்டாயம் பின்பற்றிய நிலையில், எலான் மஸ்க் மட்டும் தனது சொந்த போனில் வீடியோ எடுத்தது சமூக வலைதளங்களில் பெரிய விவாதத்தை ஏற்படுத்தியுள்ளது. மொத்தத்தில், ஒரு வல்லரசு நாட்டு அதிபருடன் செல்லும்போது எவ்வளவு வசதிகள் இருந்தாலும், ஒரு சின்ன போன் விசயத்தில் கூட இவ்வளவு கட்டுப்பாடுகள் இருப்பது ஆச்சரியம்தான்!